Alternativa Cidadá de Esquerdas insta ao Goberno do concello de Lugo a colaborar coa Xunta para axilizar a retirada da simboloxía franquista do IES Lucus Augusti.
No pleno de mañá, ACE defenderá unha moción para que o concello se coordine coa autoridade autonómica para completar a retirada do resto de símbolos franquisas que existen en edificios públicos de Lugo tal e como establece a Lei de Memoria Histórica.
“Non entendemos que haxa grupos municipais en Lugo que se teñan atrevido a chamar publicamente ao alzamento contra a legalidade, e ante a preocupante epidemia de sublevación que sofren boa parte dos membros desta corporación, cremos esencial que este asunto se trate abertamente en Pleno, para que tódolos partidos teñan a oportunidade de confirmar que respectan escrupulosamente a vixente Lei de Memoria Histórica”, aclara Carlos Portomeñe, voceiro de ACE-EU.
