ADEGA-Lugo mostra a súa total oposición á ocupación da zona de servidume do río Rato, “por moi pequena que sexa”. Faino en resposta ao anuncio de que a Xunta de Galiza, a través da Axencia Galega de Infraestruturas (AXI), e o Concello de Lugo están a promover as obras de ensanche e mellora da Rúa Serra de Meira entre as rotondas da ponte de Paradai e a da Avda, Adolfo Suárez. “As beiras do río deben protexerse e conservarse como espazo verde”, sinalan.
Neste anuncio, a Xunta indica que valorou varias propostas, e que se decantou por unha que supón a ocupación e alteración dunha zona inundable do río Rato, en detrimento doutra proposta que non ocuparía nada. Dende ADEGA creen “que a Xunta de Galiza non pode pretender ampliar a estrada mediante a redución do espazo do río, tan só coa xustificación de que así a obra quedaría máis recta e o aparcadoiro máis amplo. Esta decisión pon en risco a seguridade das persoas e bens en caso de inundación, xa que altera a zona de inundabilidade do río”.
ADEGA-Lugo insta á Confederación Hidrográfica Miño Sil “a que emita informes correctores da proposta con base a preservar a zona de inundabilidade segundo a Lei”. A organización ecoloxista tomará as medidas oportunas para salvar a zona inundábel do río Rato do parque do Sagrado Corazón, como xa vén facendo ata agora, para preservar os cursos fluviais o máis saudábeis posíbeis.
