A Alcaldesa de Lugo, Lara Méndez, asinou esta mañá un decreto no que autoriza a contratación urxente dunha empresa para demoler de maneira inmediata o edificio número 42 da rúa Xulia Minguillón (esquina con Camiño Real), cuxa cuberta se veu abaixo na mañá do pasado mércores, por presentar un grave perigo de novos desprendementos e polo tanto risco para a cidadanía, segundo os informes técnicos do servizo municipal de Arquitectura, que declarou o edificio en ruína técnica inminente.
Deste xeito, os traballos de demolición comezarán de maneira inmediata, en canto a empresa contratada poida facelo, xa que debe nomear unha dirección de obra, coordinación de seguridade e saúde e presentar o Plan de Seguridade e Saúde. Os custes das obras de demolición serán repercutidos aos propietarios do inmoble.
