En temas coma o de Altri, a opinión pública toma postura drástica: para uns é maná; para outros, catástrofe. Hai sete décadas, As Pontes fíxose industrial, en base á mina de lignito e ao conxunto creado arredor, recibindo centos de traballadores dunha ampla contorna. Que a cheminea ciscase lixo por media Europa non preocupaba; o esencial era comer. O actual lago, despois de tanto tempo axuda no balance. Non moitos anos despois, a Autopista do Atlántico foi recibida como “unha navallada á nosa terra”, e hoxe percorrer Galicia sen esa autopista sería imposible. O tempo, xuiz inexorable.
Altri, si ou non?… Todos queremos unha Galicia con industria que cree emprego, fixe poboación e non contamine. Parte importante dos galegos oponse frontalmente a industrias coma esta, pero se os organismos competentes aproban esa industria porque as medidas que se van tomar cumpren coa Lei, as algaradas non poden superar os trámites oficiais, os informes pertinentes. Porque se eso non vale para nada, e a opiniòn popular vale máis ca a dos técnicos, se os organismos competentes non merecen atención, apaga e vámonos. Que un famoso berre contra Altri, se non é especialísca en ecoloxía e natureza, a súa opinión vale o mesmo ca a do anónimo que contesta a unha enquisa da televisión á hora do vermut.
Altri, non, se vai contaminar, se está mal planteada, se estraga e luxa. Altri si, se respecta a natureza, non agrede, aproveita recursos naturais e proporciona postos de traballo. Se se monta e resulta un problema ou un fraude, ao xulgado. Se funciona correctamente e a gusto de todos, aquí paz e despois gloria.
