A alerta chegou ao 112 Galicia pasados uns minutos da medianoite, a través da chamada dun particular que informaba de que un alpendre situado ao carón dunha vivenda no lugar de Campelo, na parroquia de Monforte de Lemos estaba ardendo. No seu interior, segundo explicou, había maquinaria agrícola, vehículos e outros enseres.
Desde o Centro Integrado de Atención ás Emerxencias do 112 Galicia mobilizáronse de inmediato os Bombeiros de Monforte, a Policía Nacional e Local, así como efectivos de Protección Civil.
A intervención prolongouse debido ás características do lume, que xa está controlado, aínda que os servizos de extinción continúan traballando para evitar posibles rebrotes. Segundo indicaron os Bombeiros, ardeu un tractor, diversa maquinaria agrícola e bolos de herba almacenados no interior da estrutura. Afortunadamente, non houbo que lamentar danos persoais.
