Delegadas da CIG manifestáronse este mércores en Lugo no marco da campaña do 25 de Novembro, Día Internacional para a eliminación da violencia contra as mulleres, que este ano a central sindical desenvolve baixo o lema “Non hai violencia que nos pare na conquista da igualdade”.
Esta mobilización, que foi precedida dun encontro nacional de formación e debate, constitúe tamén unha mostra de apoio e solidariedade das mulleres da CIG ás traballadoras do sector da limpeza, que levan 38 días en folga para reclamar un convenio digno.
Este ano a CIG quixo centrar a súa campaña na relación entre violencia e desigualdade e denunciar o papel das institucións que “fan paripés” en datas sinaladas do feminismo mentres “as condicións materiais se manteñen”.
A secretaria confederal de Mulleres da CIG apelou ás administracións para que “non só saian o día 25 a facer declaracións rimbombantes, senón que poñan en marcha todas as medidas necesarias para facer efectiva e real a igualdade entre homes e mulleres”. Neste sentido valorou que a situación de precariedade que viven as traballadoras de sectores feminizados, como a limpeza ou os coidados, son un exemplo de discriminación por razón de xénero.
