O Conxunto Etnográfico das Pallozas do Cebreiro abrirá ao público durante as fins de semanas, ampliando así a dispoñibilidade de visitas.
Así, a Consellería de Cultura, Lingua e Xuventude amplía ás fins de semana os horarios de apertura de este espazo, grazas á incorporación de persoal que estará encargado da recepción e acompañamento á palloza Xan López, que permanecerá aberta sábados e domingos, de 9:00 a 14:00 horas. A través destas visitas, que serán guiadas, a xente poderá descubrir a historia dos devanceiros galegos que habitaron este entorno, de aproximadamente 300 metros cadrados, onde tamén se atopan as outras tres construcións que reciben o nome de Quico, Galán e Campelo.
Ademais, como complemento a estas rutas, a Consellería de Cultura, Lingua e Xuventude tamén porá en marcha diferentes actividades didácticas e de lecer relacionadas con este conxunto que xestiona o Museo do Castro de Viladonga, un dos centros que pertence á rede de museos xestionados pola Xunta de Galicia.
Os visitantes poderán coñecer estas construcións de planta ovalada, muros baixos e teitos de palla que foron habitadas durante séculos e a través de todos os obxectos que se atopan no seus interiores, poderán descubrir como era a vida tradicional na montaña lucense, o traballo agrícola e gandeiro ou aspectos da vida cotiá das persoas.
