Dende a Asociación de Veciños, Comerciantes, e Industriais Distrito da Milagrosa que preside D. Jesús Vázquez Varela, e que representa aos veciños e veciñas deste importante barrio da Milagrosa, con máis de 20.000 habitantes e que contamos con máis de 400 socios, queremos manifestar publicamente a nosa rotunda Felicitación polo exemplar labor que están a levar a cabo, tanto as Forzas e Corpos de Seguridade do Estado dependentes da Subdelegación do Goberno, como por parte da Policía Local dependente do Concello de Lugo.
Cremos que están a desenvolver un labor moi efectivo no noso barrio, e que merece todos os nosos eloxios, por tanto, cumpre felicitar a estas Forzas de Seguridade polo seu labor no barrio da Milagrosa.
Vemos que a última xunta local de seguridade, foi efectiva, xa que se acordou deseñar un programa de seguridade para o barrio, e ese programa está a dar resultados. Vemos unha presenza permanente no barrio, tamén os seus operativos policiais a pé de rúa funcionando, tanto uniformados como non uniformados. Todo isto dá unha tranquilidade e seguridade ao barrio, insistimos en que vemos que os operativos están a funcionar, por tanto reiterámonos nas nosas felicitacións.
Somos conscientes de que o barrio ten unhas problemáticas complicadas, como a ocupación (nós sempre demandamos un cambio na lei de okupación, que faga máis efectivos os desaloxos). Tamén somos conscientes que temos problemas de tráfico de drogas, problemas asociados ás okupacións e á degradación do barrio. Con respecto aos locais coñecidos como afters na rúa Tui, manifestamos todo o noso apoio e solidariedade ás persoas da devandita rúa, especialmente aos veciños lindeiros cos locais, que teñen que sufrir diariamente ruídos, ameazas, altercados, … apoiamos totalmente a campaña de recollida de firmas que se está levando a cabo.
Propoñemos cambios na Lei de Espectáculos da Xunta de Galicia, así como axilidade nos trámites administrativos, que Policía Local pasa a través dos seus expedientes en base a incumprimentos de horarios, ruído, …
Apostamos pola Rehabilitación Integral, (ARI ou ARU). Levamos anos demandándoa.
Solicitamos ao Concello de Lugo, a máxima rapidez para levar a cabo a rehabilitación integral do barrio. Pedimos que se inicie xa unha campaña informativa dirixida aos propietarios da zona vella do barrio, para explicar as vantaxes, axudas, … dunha ARI ou ARU, é dicir dunha rehabilitación.
Ante toda esta problemática, nós pedimos, unidade e traballo coas diferentes administracións.
A Milagrosa sempre foi o Barrio dos Barrios, o Barrio Senlleiro de Lugo, por máis que algúns se empeñen en facernos crer que vivimos no
Bronx ou en Wichita Cidade sen Lei.
Asociación de Veciños Comerciantes e Industriais Distrito Dá Milagrosa.
