Carlos Rodríguez Otero vén de ser nomeado director de Música do St. Edmund College da Universidade de Oxford (Reino Unido), coñecido popularmente como “Teddy Hall”, que se considera a máis antiga sociedade para a educación de calquera Universidade.
St. Edmund College dá gran importancia á música dentro da súa actividade, e Carlos Rodríguez terá, entre as súas responsabilidades centrais, a dirección do Coro da entidade, e o desenvolvemento dunha escena musical inclusiva e vibrante. O seu primeiro traballo consistirá na dirección da xira anual do coro á Abadía de Pontigny na Borgoña francesa, o próximo mes de setembro.
Nacido en Santiago, medrou en Bristol e alí estudou violín e piano. Foi profesor de coro no Queens’ College de Cambridge, e secretario laico tenor en St. John’s College, Cambridge, así como director de Fisher House Schola Cantorum, e de diversos proxectos corais e orquestrais en todo o Reino Unido. Como tenor, canta co grupo Tenebrae, e ten actuado co Orfeón Lucense. Ensina música a persoas de todas as idades, e ademais de compositor e músico practicante, está rematando un doutorado en música sacra do século XVI no norte de España, cun enfoque académico xeral na música medieval y moderna en Inglaterra, España e Italia.
Carlos Rodríguez é fillo de Santiago Rodríguez, Fillo Adoptivo de Paradela, e neto do Fillo Predilecto Manuel Rodríguez López, tendo participado como músico desde moi neno nos actos do Certame Literario paradelense.
