Os servizos sanitarios de urxencia trasladaron a catro persoas que resultaron afectadas pola inhalación de fume dun incendio no interior dunha casa, en Sober.
Segundo a información facilitada ao 112 Galicia, o incendio produciuse ás cinco desta tarde, cando os ocupantes da vivenda deron a voz de alarma por un lume que comezou nun colchón. Decontado, os xestores do Centro Integrado de Atención ás Emerxencias de Galicia pediron a colaboración dos Bombeiros de Monforte, que retiraron o obxecto incendiado e remataron por sufocar as chamas.
Con todo, catro persoas que había no interior do inmoble resultaron intoxicadas por mor do inteso fume acumulado no interior da estancia. Deste xeito, ademais dos bombeiros, desde o 112 Galicia, tamén se informou aos profesionais do 061-Urxencias Sanitarias para encargárense do traslado dos feridos. Igualmente, os servizos de emerxencias contaron co apoio dos axentes da Garda Civil.
