CCOO esixe que “na escola se cumpran as condicións de temperatura e niveis de CO2 establecidos na normativa vixente. A escola infantil municipal Gregorio Sanz está a sufrir a presente onda de calor dunha forma moi acusada. O edificio acumula a calor das altas temperaturas destes días e os termómetros das aulas rozan os 30 graos nalgunha zona da escola mesmo 32”.
Segundo o sindicato, “para paliar esta situación o persoal ten que tomar as medidas básicas de autoprotección é desposuír aos menores das súas roupas, especialmente aos bebés, e todos eles dificilmente poden descansar, comer ou xogar, con un mínimo de normalidade. As traballadoras da escola puxeron en coñecemento da Directora e da Concellería de Educación, esta situación á que se enfrontan sen obter máis solución que a de tentar no mes de agosto a instalación dalgún sistema de ventilación e ao mesmo tempo que xere calor no inverno xa que a calefacción tampouco funciona correctamente nesta estación e provoca temperaturas moi baixas nalgunha aula”.
CCOO subliña que non se cumpre a normativa e “neste caso estase a incumprir sen que os responsables políticos mostren o máis mínimo interese ou preocupación. CCOO esixe que se deixe de poñer en risco a saúde das nenas e nenos escolarizados, así como das traballadoras do centro”.
Xa no ano 2017 un grupo de titores de usuarios puxeron unha queixa ante a Xunta de Galicia e corroborouse pola súa banda o exceso de temperatura dando instrucións ao Concello para emendar esta situación. A solución dada de aquela “foi ventilar o edificio. Sen máis. Unha vez máis se segue sen solucionar un problema nin a curto nin a longo prazo. A única resposta é desabrigar e ventilar. O persoal do centro segue esperando algunha medida para resolver este problema de control de temperaturas do edificio, xa que é unha parte moi importante no benestar de menores e un dereito da protección da saúde do persoal municipal que debe exercer o seu labor cunha temperatura moi elevada”.
CCOO tentou poñerse en contacto co BNG, como responsable desta Área, co fin de atopar unha solución urxente a este problema, “sen que ata o momento se dignaran a devolver as chamadas. Dende o sindicato CCOO denunciamos a actitude do BNG que por unha banda dí defender os dereitos da cidadanía, e pola outra ten abandonados a neniñas e neniños, e ás propias traballadoras”.
