A candidata de Cs, Olga Louzao, deu a coñecer esta mañá o seu plan de vivenda municipal que pretende solucionar os problemas que vive Lugo nesta materia. “Lugo é a terceira capital da provincia de España con máis vivendas baleiras. Tamén contamos cunha gran cantidade de edificacións en estado ruinoso ou moi deteriorado cuxa habitabilidade é nula. Non obstante, o prezo da vivenda de segunda man e dos alugueres non para de subir, xa que a oferta é moi limitada. Propoñemos executar un programa de rehabilitación de inmobles con fondos europeos e facilitar o acceso ao aluguer dos mozos a través dunha liña de axudas para inquilinos e bonificacións fiscais para propietarios. Ademais, no próximo mandato poremos en marcha un programa de convivencia interxeracional en colaboración coa USC, que permite que os universitarios compartan vivenda só con persoas maiores”, apuntou a candidata.
“O 20% do noso parque de edificios está baleiro e case o 40% ten máis de 40 anos. Un dos principios dunha cidade verdadeiramente sostible debe ser reutilizar e recuperar o que existe. É vital para o futuro de Lugo recuperar vivendas para rexenerar as zonas degradadas. Para iso queremos crear unha liña de axudas, que conte cunha partida orzamentaria propia, e que poida cubrir ata o 100% da rehabilitación dos inmobles destinados a primeira residencia en zonas degradadas. De forma complementaria apostamos pola creación dunha oficina de rehabilitación de vivendas no norte da cidade, que axude aos veciños no proceso de rehabilitación e tramita as diferentes liñas de axuda. Deste xeito poderemos ampliar o parque de vivendas e rexenerar os nosos barrios ao tempo que determinamos a poboación”, explicou Louzao.
“Esta medida compleméntase cunha partida creada nos orzamentos municipais para axudas ao aluguer para mozos e bonificacións fiscais para os propietarios coa Administración local como mediadora no proceso, dando garantías a ambas as partes. Son moitas as familias que optan por residir nos concellos limítrofes debido á á falta de abastecemento na cidade. Hai que dar solucións á perda de atractivo como concello”, afirmou Louzao.
