A candidata de CS á alcaldía, Olga Louzao, manifestou esta mañá a necesidade de achegar solucións urxentes aos problemas de aparcamento que sofre a zona centro. “A falta de aparcamento é un problema enquistado que está a limitar o potencial do noso centro histórico como zona comercial. O fluxo de persoas que acoden aos locais comerciais do centro está a reducirse, preferindo acudir a outras zonas comerciais, onde non exista este problema”, afirmou Louzao.
Para loitar contra este problema, a candidata propón crear un novo aparcamento gratuíto en superficie na Rúa Castelao, o que permitiría dotar de numerosas prazas de aparcamento nas inmediacións do centro histórico. “Coa creación deste aparcadoiro permitiremos que moitos máis cidadáns non teman achegarse ao centro da cidade, como está a pasar na actualidade”, explica a alcaldable.
Outra medida proposta por Louzao e levada a pleno durante este mandato por Cidadáns é negociar coas administracións públicas a apertura dos seus aparcamentos en horario de tarde e fins de semana. “O que non é de recibo, é que tanto o BNG como o PSOE debido ás obras que emprenderon este mandato retirasen numerosas prazas de aparcamento, sen dar ningunha solución a este problema. En Lugo temos 54 parroquias, onde é necesario o uso do coche, negar esta realidade é non coñecer realmente o municipio. Por iso é necesario liquidar este problema cun trasnporte público eficaz e creando lugares para aparcar, o goberno local non levou a cabo ningunha destas dúas accións. É necesario reverter a situación, dos contrario a transformación da cidade sería un fracaso”, afirma a concelleira. Outra das nosas propostas para axilizar o aparcamento en Lugo é “recuperar o sistema rotatorio ao redor dos xulgados, Xunta de Galicia e concello, ao ser edificios con moito fluxo de persoas, pero querémolo facer gratuíto durante unha hora, para que as persoas poidan realizar as xestións que necesiten, pero que permitan ao resto de cidadáns a levalas a cabo”, explica a candidata.
Por último, neste plan Louzao tamén quere bonificar a primeira hora nos aparcamentos subterráneos se se compra nos negocios do centro ou se consome nos establecementos asociados. “Desta maneira apoiamos que a xente acuda ao centro histórico, incentivando o consumo local e permitindo ao centro competir en igualdade de condicións con outras zoans comerciais da cidade”, finaliza a alcaldable.
