Codex Cinema estrea este venres 8 de setembro o filme francés “As dúas caras da xustiza” e a cinta española “Creatura”, gañadora do premio a Mellor película europea (Quincena de realizadores) no pasado Festival de Cannes 2023.
“As dúas caras da xustiza” da directora Jeanne Herry, é un filme que non teme ás emocións, senón que respecta cada unha das súas manifestacións. Todo parece verdade nesta película. Sinopse: a xustiza restaurativa ofrece ás vítimas e delincuentes a oportunidade de dialogar nun ambiente seguro, baixo a supervisión de profesionais e voluntarios. Este é o caso de Nassim, Thomas e Issa, condenados por roubo con violencia, e de Grégoire, Nawelle e Sabine, vítimas do mesmo crime. Uns e outros enfrontaranse; tamén Clohe, vítima de violación. No camiño, todos experimentan rabia e esperanza, silencio e palabras, alianzas e rupturas. A confianza restablecida. E ao final do camiño, quizais, a reparación.
Baixo a dirección de Elena Martín chega a película “Creatura”, unha proposta arriscada, atrevida e deslumbrante, que consigue poñer ao espectador contra a parede dos seus propios prexuízos. Sinopse: despois de mudarse coa súa parella a un novo fogar, Mila decátase de que a súa perda de desexo atópase dentro de si mesma. A partir de aí, comeza unha viaxe na que revisa experiencias da súa infancia e adolescencia coa esperanza de reconciliarse co seu propio corpo. Este filme gañou no Festival de Cannes 2023 o premio mellor película europea (Quincena de realizadores).
E con motivo da estrea a vindeira semana do novo filme de Nanni Moretti “O sol do futuro”, os cines Codex van a proxectar nas súas pantallas este xoves 7 de setembro “ Caro diario”, filme de 1993. Sinopse: película dividida en tres episodios, que reflicte a vida e as opinións do director: “Na miña vespa” é unha aproximación á vida cotiá de Roma durante o mes de agosto; en “Illas” visita a Gerardo, un amigo que vive en Lipari dende hai once anos; xuntos percorren outras illas como Salina, Stromboli, Panarea e Alicudi. En “Médicos”, o director roda a súa propia quimioterapia e o seu percorrido por hospitais e especialistas incapaces de diagnosticar a causa duns insoportables picores.
