O colectivo lucense Egeria, coa colaboración do Colexio Fingoi e o patrocinio da Xunta de Galicia, vai dar comezo ás actividades do proxecto Don Ricardo de Fingoi (Carballo Calero en Lugo), con motivo de serlle dedicado este ano o Día das Letras Galegas ao profesor e escritor que residiu e traballou en Lugo desde 1950 a 1965, como profesor e responsable do Colexio Fingoi.
As dúas primeiras fases deste proxecto son unha exposición itinerante e unha páxina web, que serán presentados o próximo mércores, ás doce, nun acto que se desenvolverá nas instalación do Colexio Fingoi, e no que participarán representantes da familia do homenaxeado, da Xunta de Galicia e da Real Academia Galega, profesores e alumnos do Colexio Fingoi, e numerosos lucenses que estudaron neste Colexio nos tempos de Ricardo Carballo Calero.
