Amnistía Internacional de Lugo convoca unha concentración para que se prohiban as redadas e as identificacións racistas; o acto terá lugar o vindeiro martes 25 de marzo ás 20:00h, diante da Subdelegación do Goberno de Lugo, baixo o lema: Parade o racismo e non ás persoas.
Esta concentración ten como obxectivo “denunciar a vulneración de dereitos que supoñen as redadas e as identificacións racistas, baseadas unicamente en perfís raciais”. Dentro de poucos meses espérase que o Parlamento aprobe unha reforma da Lei Orgánica de Seguridade Cidadá (Lei Mordaza) para o que Amnistía Internacional leva anos mobilizándonos e denunciando a vulneración de dereitos que implica. “Unha das principais peticións de todos estes anos sobre a que poñemos o foco con esta acción é a prohibición expresa e mecanismos de control das redadas e as identificacións racistas, que son unha manifestación do racismo estrutural”. Para iso é necesario que movementos sociais, activistas e colectivos antirracistas, organizacións de dereitos humanos, etc., se mobilicen e actúen conxuntamente para denunciar a existencia das redadas de perfil racial e reclamar a súa prohibición expresa na Lei Mordaza.
