Cs aposta por abrir a xestión dos fondos para a reconstrución aos axentes sociais

O concelleiro de Cs Lugo Juan Vidal-Pardo informou esta mañá que o seu grupo propoñerá no próximo pleno crear unha Mesa de Avaliación Local dos proxectos municipais que vaian ser xestionados polo Concello a través dos denominados Fondos europeos para a reconstrución. Vidal-Pardo ve necesario tamén realizar un seguimento da implantación e unha avaliación do impacto para asegurar a rendibilidade social e económica das futuras iniciativas.

“Esta importantísima inxección económica destinada a mitigar o impacto económico e social da pandemia sen dúbida constitúe unha oportunidade histórica para a nosa cidade. Con todo non significa un cheque en branco para gastar sen control por parte dos diferentes niveis institucionais”, asegurou.

Vidal-Pardo explicou que a única forma de asegurar de forma efectiva este diñeiro reverta na sociedade é establecer un procedemento regrado para a súa adxudicación no que participen os principais axentes sociais. “Debido á cantidade de fondos que debemos absorber, é máis importante que nunca facelo de forma racional e desde a máis estrita obxectividade, sen que os intereses políticos ou partidistas sexan os criterios prioritarios. Por iso, é necesaria a creación dunha Mesa de Avaliación Local, para asegurar a eficiencia dos proxectos e que ver por unha execución transparente, equilibrada e despolitizada dos recursos procedentes da Unión Europea e que sexan xestionados polo noso municipio”, asegurou.

Ferramenta de prevención contra o malgasto
“Por iso, deberían formar parte da Mesa aqueles membros do goberno municipal con responsabilidades na xestión dos fondos europeos, así como representantes dos distintos grupos municipais da oposición, acompañados por profesionais destacados da sociedade civil, os axentes sociais e empresariais do municipio, co obxectivo de buscar o máximo consenso, unha participación activa e vinculante que asegurarán a sustentabilidade no tempo destes proxectos e plans de investimento, mellorando os sistemas de control co máximo compromiso coa negociación e a saúde democrática”, dixo. “A constitución desta mesa é unha ferramenta de prevención contra o malgasto que estamos a ver en Lugo con fondos de procedencia europea como a nefasta xestión dos DUSI. Temos que conseguir que o que está a pasar agora non se repita no futuro, goberne quen goberne”, concluíu.