O Presidente da Deputación, Darío Campos Conde, xunto ao Alcalde de Ribas de Sil, Miguel Ángel Sotuela Vega, informou esta mañá que o Goberno Provincial acadou un investimento de 2 millóns de euros en impulso dos servizos públicos deste municipio, tendo en conta as actuacións levadas no último ano e medio.
Campos Conde fixo referencia á residencia e centro de día público, que está en plena execución; ás melloras en vías de comunicación e dotacións públicas finalizadas, así como á prestación de servizos públicos; ademais das novas actuacións que se efectuarán con máis de 200.000 do presuposto deste ano e a través do Plan Único da Deputación en todos os Concellos da provincia.
Campos Conde e Sotuela Vega supervisaron as obras de construción da residencia e centro de día público cuxos traballos están en plena execución, coa previsión de rematalos nos vindeiros meses para, posteriormente, adquirir o mobiliario e solicitar a licencia de apertura imprescindible á Xunta de Galicia. O Goberno da Deputación achega só á construción do centro 1,2 millóns de euros, pois logo asumirá o equipamento. O Concello de Ribas de Sil colabora con 200.000 euros e a cesión dos terreos.
