O voceiro do Executivo Provincial, Álvaro Santos Ramos, informou este venres que a Xunta de Goberno aprobou a adxudicación dos primeiros traballos para a construción da residencia e centro de día público da Deputación no Concello de Becerreá. Santos Ramos explicou que “son traballos que terán un custe de 70.000 euros, que consisten na demolición da antiga Escola Fogar e acondicionamento da parcela onde se sitúa.
Para o deputado, o centro de maiores de Becerreá “é dunha dotación social moi demandada polos veciños dende hai anos”, e que, tras o compromiso a executala que fixo Feijoo no 2009, o Concello puxo a disposición do Goberno galego os terreos e o proxecto de construción, “que agora ten que asumir a Deputación con 100.000 euros”.
Deputación e Concello de Becerreá, que sempre defenderon esta dotación social, asumen a súa construción en 4 anualidades. O organismo provincial ten comprometidos 103.700 euros do orzamento de 2016, dos que, finalmente, tras as baixas na contratación, se empregan 70.000 euros; 2 millóns de euros este ano, 2 millóns no 2018, e unha última achega no 2019 de 1 millón.
Logo do remate dos traballos de demolición e adecuación do terreo, que previsiblemente será cara maio, o Goberno da Deputación iniciará o proceso de contratación do proxecto de construción do centro de maiores. Estas instalacións ofrecerán un mínimo de 96 prazas na residencia e 40 no centro de día.
Asemade, a Xunta de Goberno provincial acordou tamen iniciar o proceso de adxudicación para un servizo de documentación do patrimonio artístico, cultural e artesanal da Deputación. Sácase a contratación, segundo informou Álvaro Santos Ramos, por un prezo máximo de 98.000 euros para catalogar todas as pezas do CentrAD, da Capela de Santa María e do Museo Provincial.
