A ministra de Agricultura, Alimentación e Medio, Isabel García Tejerina, presentou hoxe o novo Plan de Impulso ao Medio Ambiente para a Adaptación ao Cambio Climático no estado (PIMA Adapta), que inclúe un investimento de 12,1 millóns de euros para máis de 46 actuacións na costa, o dominio público hidráulico e os Parques Nacionais.
A ministra detallou en rolda de prensa o contido desta iniciativa, cuxas actuacións iniciaranse o próximo mes de abril, e que arranca co obxectivo de poñer en marcha, con carácter pioneiro e con vocación de continuidade no tempo, proxectos concretos de adaptación ao cambio climático”, destacou.
Este plan inclúe, por primeira vez, unha batería de actuacións que terán en conta o estado de coñecemento dos impactos do cambio climático, así como os riscos e a vulnerabilidade para o deseño dos proxectos sobre os que se realizará un posterior seguimento.
García Tejerina subliñou que a loita contra este fenómeno require medidas de mitigación para frear a acumulación de gases de efecto invernadoiro na atmosfera, pero tamén de adaptación para minimizar os riscos e impactos que se deriven.
“Ambos os dous tipos de resposta están estreitamente vinculados”, destacou a ministra, tras valorar o “xiro completo” que deu o Ministerio á política de cambio climático. Envorcámonos en reducir as emisións de CO2, aquí. E para iso puxemos en marcha toda unha batería de plans e proxectos de mitigación de gases de efecto invernadoiro coa intención de reducir as nosas emisións e á vez crear actividade económica e emprego de calidade”, resumiu.
García Tejerina explicou que as zonas do litoral son as que teñen un maior risco de sufrir os impactos, polo que a reforma da Lei de Costas aprobada en 2013 incluíu a elaboración dunha Estratexia para a Adaptación da Costa a estes efectos, actualmente en fase de tramitación de avaliación ambiental estratéxica. “Con iso, búscase conseguir un diagnóstico rigoroso dos riscos asociados ao cambio climático que afectan á nosa costa e das posibles medidas que se poidan adoptar”, asegurou.
Así, o Plan PIMA ADAPTA incorpora máis de 40 proxectos en materia de xestión do litoral entre eles o de Galicia.
Trátase de reducir a exposición da costa fronte ao mar e para iso levaranse a cabo actuacións de rexeneración de praias, restauración de dunas, estabilización das partes baixas de esteiros e obras de protección que reduzan a erosión.
Ademais, prevé manter o bo estado dos ecosistemas costeiros con proxectos de restauración e protección de marismas ou brañas, e iniciativas para promover as áreas costeiras ou mariñas protexidas, entre outras, xunto á mellora da investigación e o coñecemento e doutras accións de concienciación e divulgación neste ámbito.
