O novo delegado do Goberno en Galicia, José Ramón Gómez Besteiro, reivindicou hoxe na súa toma de posesión a “política para as persoas”, baseada na cooperación, no diálogo e na defensa do interese común.
Gómez Besteiro prometeu este mediodía o seu cargo sobre o artigo 14 da Constitución que proclama a igualdade perante a lei, nun acto institucional que contou coa presenza do presidente da Xunta de Galicia, Alfonso Rueda, o ministro de Sanidade, José Miñones e o secretario de Estado de Política Territorial, Alfredo González. Xunto a eles, asistiron os máximos responsables de institucións políticas, xudiciais e militares de Galicia.
Na súa intervención, o delegado do Goberno na Comunidade, repasou as prioridades cara esta nova etapa, na que se comprometeu a facer da Delegación “un Goberno a pé da rúa”, que teña como primeira premisa de acción a proximidade coa cidadanía. E, nesta liña, tendeulle a man ao presidente da Xunta de Galicia para “facer política de verdade entre todas as administracións” ante “unha oportunidade histórica” polos fondos do Plan de Recuperación do Goberno.
Xustiza social, económica e ecolóxica
No que respecta á xustiza social, lembrou a acción do Goberno fronte aos efectos da pandemia e da guerra, que demostra que “hai outra maneira de saír das crises: facelo sen deixar a ninguén atrás. Chegamos a todas as familias galegas e a todos os seus membros”, coa revalorización das pensións, a suba do salario mínimo, as becas ao estudo ou o ingreso mínimo vital”.
No eido da xustiza económica, que “vai máis aló do simple investimento, e que se manifesta no Plan de Recuperación do Goberno e que chega a cada un dos concellos galegos, do máis grande ao máis pequeno”,
E, por último, a xustiza ecolóxica, que “impulsou a este Goberno a crear unha reconversión industrial” e que posibilita que Galicia reciba “investimentos millonarios para novas enerxías como o hidróxeno verde, para enerxía limpa nos municipios máis despoboados ou para a transición das centrais térmicas”.
Retos de seguridade
Como máximo responsable da seguridade do Estado en Galicia, José Ramón Gómez Besteiro recoñeceu o traballo da Garda Civil e da Policía Nacional como garantes da liberdades públicas “con valor, dedicación e compromiso persoal”. Ante os máximos responsables do CNP e da Garda Civil en Galicia e trasladou o seu compromiso de continuar a mellora de plantillas iniciadas nesta lexislatura.
