Recepción dos fogares por parte da alcaldesa e a concelleira de Muller, Ángeles Novo.A través do Plan de Recuperación, Transformación e Resilencia con fondos europeos, foron reformadas e rehabilitadas catro vivendas na cidade de Lugo que serán o espazo seguro de mulleres que tivesen vínculos nos que se desenvolvesen violencias. A intervención, impulsada polo Executivo socialista e a Concellería de Muller, contou cun investimento de 365.342 euros para a axeitada rehabilitación dos inmobles. Estes responderán correctamente ás necesidades básicas, dende eléctricas ata ergonómicas, das novas habitantes das mesmas.
As obras implicaron unha renovación completa do interior dos fogares, incluíndo o cambio de revestimentos, pavimentos, falsos teitos, carpintería metálica con ventás de dobre acristalamento, renovación de saneamentos e instalacións eléctricas. Ademais, actuouse nas zonas comúns dos edificios para mellorar a eficiencia enerxética e reducir custos de mantemento. Estas melloras permiten garantir un maior confort térmico e acústico para as futuras usuarias.
