Logo do repunte de positivos rexistrado onte na residencia Domus Vi de Outeiro de Rei, con 109 novos casos activos, hoxe de novo increméntase de forma substancial o número de infectados, con 119 máis nas últimas 24 horas e que fan un total de 920 afectados na área sanitaria de Lugo.
Asemade e segundo informa a Dirección Xeral de Saúde Pública da Consellería de Sanidade na súa última actualización, hai que lamentar o falecemento de dúas persoas en centros residenciais. Un tivo lugar na residencia de maiores DomusVi de Outeiro de Rei e o outro falecemento aconteceu na residencia de maiores do Incio.
Os datos de centros residenciais de servizos sociais corresponden aos que achegan con carácter diario os propios centros.
En canto ao número total de casos activos de coronavirus en Galicia é de 4.364 deles 1.424 son da área da Coruña, 920 da de Lugo, 462 da de Ourense, 379 da de Pontevedra, 344 da área de Vigo, 659 da de Santiago, e 176 da de Ferrol.
Do total de pacientes positivos, 25 están en UCI, 181 en unidades de hospitalización e 4.158 no domicilio. Polo de agora, en Galicia hai un total de 14.158 persoas curadas, rexistrándose 668 falecementos. As dúas últimas persoas falecidas en centros hospitalarios foron dous homes de 81 e 71 anos que estaban ingresados no CHUS e no HULA, respectivamente. Ambos presentaban patoloxías previas.
O número de PCR realizadas é de 374.635.
