Imaxe de arquivo dunha das reunións coa veciñanza do centro históricoLara Méndez volveu pedir “paciencia” esta mañá aos veciños e comerciantes do centro de Lugo ante as obras enmarcadas na peatonalización de Santo Domingo. “Sabiamos dende o principio que isto ía xerar alteracións no día a día, polo que lles damos as gracias á cidadanía por esa paciencia que lles pedíramos”, sinalou a alcaldesa.
Méndez aproveitou para xustificar a simultaneidade das obras que se están executando no centro. Segundo a alcaldesa, débense aos “hitos que nos veñen impostos dende Europa”, en relación aos fondos que foron concedidos ao Concello para levar a cabo estes traballos. Tamén xustificou o retraso nas obras como algo normal neste tipo de situacións: “Hai retrasos porque xorden acontecementos que non estaban previstos”.
A alcaldesa tamén afirmou que a comunicación entre o Concello e os veciños e empresarios é “constante e continua” e que o PP pretende crear un “circo mediático” co que causar “tensión e crispación” á cidadanía. “Presencialmente xa tivemos moitos encontros coa plataforma da veciñanza que se creou, e coa que temos prevista nos vindeiros días outra reunión para este mesmo fin, máis aló dos correos e as chamadas que son diarias”.
