Lugonovo denuncia que a Biblioteca Pública de Lugo, da rede da Xunta de Galicia, publicite un certame con motivo do día das Letras Galegas empregando o castelán. En concreto, denuncian que en dito anuncio se lle chama “Día de las letras Gallegas” a esta celebración.
Desde Lugonovo cualifican como “sorprendente” que un ente publico “que debera velar pola defensa e o apuntalamento da nosa lingua” castelanice o día das nosas letras. Para a formación, este feito “é un fiel reflexo da sociedade galega actual, na que a nosa lingua sempre queda relegada a un segundo (ás veces terceiro) posto, e o proceso de diglosia se acrecenta cada día máis”.
A este respecto, Lugonovo considera que son as institucións públicas as que teñen o deber e a obriga de defender a nosa identidade cultural, e é a xente do común, axudada das asociacións e entes culturais, a que debe esixir esta defensa.
