Lugonovo e Alternativa Cidadá de Esquerdas esixen a comparecencia do Goberno para aclarar o atropelo mortal dunha veciña

Os concelleiros do Grupo Municipal Lugonovo esíxenlle á alcaldesa que compareza publicamente para dar explicacións do acontecido o pasado luns, cando un furgón de atestados da Policía Local atropelou a unha veciña nunha rúa da capital ocasionándolle a morte. Os tres edís de Lugonovo, amosan o seu pesar polo acontecido e pídenlle á rexedora “que convoque unha rolda de prensa para ofrecer tódolos datos oficiais deste fatídico atropelo”.

O portavoz da formación, Santiago Fernández Rocha, denuncia que “é inadmisible que o executivo tardara máis dun día en facer pública a traxedia. A súa xestión foi tan nefasta que só evidencia a falta de transparencia coa que operan”.

“Agochalo durante case 48 horas supón, cando menos, unha escasa mostra de empatía cos familiares e achegados da vítima e pon de manifesto as poucas habilidades do goberno para asumir as súas responsabilidades”, engadiu o voceiro.

Ace-Eu esixe que o goberno local reúna con urxencia a xunta de voceiros para informar do atropelo

Ace-Eu, tamén pediu que compareza a alcaldesa Lara Méndez, como responsable directa da Policía Local porque “a credibilidade pública do Concello de Lugo quedou en entredito”, salientou o concelleiro de ACE-EU, que quixo aproveitar para lamentar profundamente o pasamento da veciña atropelada e trasladar as súas condolencias á súa familia e xente achegada.

“O primeiro é pensar nas vítimas deste desafortunado accidente. A actitude do goberno local e a súa mala xestión institucional do acontecido só contribuíu a xerar máis malestar e frustración aos familiares afectados, que xa de por si están suficientemente doídos ante unha traxedia destas características”. Portomeñe incidiu en que hai que  Informar con normalidade e transparencia é o mínimo que se agarda da administración ante un caso deste tipo,  e agora á Lara Méndez tócalle explicar porqué se tomaron tan malas decisións”.