A Xunta, a través da Axencia para a Modernización Tecnolóxica de Galicia (AMTEGA), continúa cos traballos para mellorar a cobertura móbil no rural do concello de Lugo. O delegado territorial, Javier Arias, visitou a parroquia de Gondar, onde esta mañá rematou a instalación da torre que dará servizo á zona oeste do municipio.
A Xunta instalará proximamente outras dúas torres no municipio de Lugo, concretamente nas parroquias de San Pedro de Mera e Santa María Alta, para dar cobertura aos núcleos de Bacurín, Carricova, O Burgo, Hospital, San Pedro de Abaixo, San Pedro de Arriba, Cabanas, Alta, Locai, Marcoi, Riobó, Vilariño e Torible. O Goberno autonómico destinará ás tres instalacións preto de 700.000 euros.
Nos vindeiros días, Amtega iniciará tamén os traballos para mellorar a cobertura móbil en núcleos rurais de Vilalba, Mondoñedo e Láncara.
A construción destas torres en núcleos do rural de toda a comunidade forma parte dunha actuación da Xunta complementaria aos compromisos do Estado, que é quen ten as competencias en telecomunicacións.
