A mostra inaugurada esta tarde dá comezo a programación conmemorativa “75 cabodano de Castelao (1950-2025)” coa que o Museo Provincial de Lugo difundirá o legado artístico e político de Castelao no primeiro trimestre deste ano, coa colaboración de diferentes institucións galegas.
Coordinada polo Museo do Pobo Galego, reúne primeiras edicións desta publicación, representativa do labor de investigación e estudo que Castelao realizou sobre os cruceiros valorizándoos como patrimonio artístico popular e como mostra das conexións culturais entre Galiza e os países do arco atlántico.
Xunto a primeiros exemplares da obra, cuxo primeiro intento de impresión, en 1936, se truncou polo alzamento militar, e de “As cruces de pedra na Bretaña”, figuran publicacións sobre esta temática de Portugal, Irlanda, Bretaña, Illa de Man, Escocia, Cornualles e Gales.
A mostra poderá verse no Museo Provincial de Lugo ata o 30 de marzo.
