O Goberno local, a través da área de Muller e Igualdade que dirixe Silvia Alonso, retoma neste Entroido a campaña municipal para vivir estas datas libres de roles e estereotipos machistas dende a infancia. Esta iniciativa da Casa da Muller do Concello de Lugo céntrase principalmente na responsabilidade das familias á hora de comprar o disfrace e ten como obxectivo conciencialas ao redor de “que o ideal é que os disfraces poidan ser utilizados indistintamente polas nenas e por nenos”, segundo subliñou a Concelleira, cortando deste xeito cos estereotipos asignados a mulleres e homes.
Tal e como explicou a edil, a Concellería, consciente de que o sexismo segue a manifestarse nos disfraces, remitirá aos colexios do municipio unha serie de recomendacións ao respecto para que distribúan entre o alumnado en formato marcapáxinas, que tamén entregará nas escolas infantís municipais e nos establecementos de venda de disfraces. A maiores, Muller e Igualdade contactará coas asociacións de nais e pais dos distintos centros escolares e difundirá estas recomendacións a través de accións de rúa.
Entre as recomendacións a ter en conta no momento da selección da compra ou confección dun disfrace figura descartar aqueles disfraces que supoñan unha “hipersexualización” que afecta en moitos casos ás nenas menores de idade; por exemplo, aqueles disfraces de profesións dos que existen un modelo para home ea súa versión “sexy” para a muller, así como elixir disfraces que estimulen a imaxinación de nenas e nenos e desenvolvan a súa creatividade.
