O próximo luns, 20 de setembro, xornada inaugural da Semana de Cine de Lugo, vaise presentar o libro UN CAMIÑO DE CINE XACOBEO, da xornalista e escritora lucense Pilar Falcón, Presidenta da Asociación de Xornalistas Galegos en Madrid.
A presentación, do mesmo xeito que a maioría das actividades complementarias da semana, farase ao aire libre, neste caso diante da Casa do Concello de Lugo, ás 12,00h., para respectar a normativa en relación coa COVID, e tamén para achegar máis directamente aos lucenses estas actividades, das que a presentación deste libro é a única na que Fonmiñá non ten directa vinculación coa publicación.
Incluír esta presentación nas actividades da Semana de Cine débese ao vencello da xornalista e escritora Pilar Falcón coa provincia e coa capital lucense, onde desenvolveu importante actividade durante os seus primeiros anos como profesional da información. Por outra parte, para Fonmiñá resulta obrigado promover esta presentación pola temática deste libro de investigación en relación co cine xacobeo, tan directamente vencellado con Lugo, terra pola que pasan tres dos grandes Camiños a Santiago, e coa base esencial desta Semana de Cine, empeñada sempre en divulgar temas relacionados co cine entre os lucenses.
Polo indicado, o Grupo Fonmiñá comprácese en invitar (acompáñase invitación) aos cinéfilos lucenses a este acto de presentación deste libro, que o luns xa estará á venda nas librerías lucenses.
