Nunha nota de prensa difundida esta mañá polos nacionalistas, denuncian que “a estrada N-540 segue nun estado de conservación pésimo e con fochancas en todo o percorrido dende Lugo a Ourense”.
Para reivindicar o arranxo integral da devandita estrada, convocaron unha concentración a altura de Meixonfrío (Taboada), na que participaron Nestor Rego,deputado do BNG no Congreso, Efrén Castro, Vicepresidente da Deputación Provincial, Jose Portela, tenente alcalde de Taboad, xunto con concelleiros das vilas por onde pasa a N-540 e veciñanza de Monterroso, Taboada e Chantada.
O BNG subliña que“en Lugo precisamos vías seguras para estar conectados con Ourense, unha cidade coa que se ten moita relación comercial. Nos vindeiros orzamentos que se presenten no Congreso o BNG pedirá ao Ministerio de Transportes, Mobilidade e Axenda Urbana que se inclúan unha serie de partidas para o arranxo integral desta estrada”, informou Néstor Rego ás persoas alí congregadas.
O BNG esixira que o goberno do Estado actúe de maneira inmediata naqueles puntos da estrada onde o perigo para a circulación e maior, pois na mesma existen puntos onde se precisan actuacións de forma inmediata. E tamén estaremos pendentes de que se execute esa reforma integral o antes posibel sen agardar ao 2025”, sinalou.
