O Centro Cultural José Domínguez Guizán, co fin de potenciar o espírito do Nadal e que se coñezan mellor as festas en Begonte, convoca o XLVIII Certame Nacional de Poesía sobre o Nadal.
No concurso poderán participar todos os poetas que o desexen, con textos en galego ou en castelán, e cunha construción libre tanto do poema como da medida dos versos. O tema dos traballos será o Nadal desde calquera punto de vista, e valoraranse especialmente os textos que fagan referencia a Begonte e o seu Belén.
Concederanse dous premios: o Premio Begonte de Poesía, dotado con 600 euros e estatuíña de Sargadelos; e o segundo premio dotado con 300 euros e estatuíña de Sargadelos.
A remisión de orixinais farase ao correo electrónico info@belendebegonte.es, en dous arquivos: un, co traballo poético a concurso, e outro, identificado como «Plica», co título do traballo, no que figurarán os datos personais do/a autor/a, que só será aberto no caso de resultar premiado o traballo con algún dos premios instituídos ou coas mencións que, no seu caso, acorde conceder o Xurado. Tamén se pode entregar o traballo en persoa ou por correo ao Centro Cultural convocante, antes das 12:00 horas do 6 de xaneiro de 2024.
