A alcaldesa de Antas de Ulla, Pilar García Porto, denuciou esta mañá a “a gravísima situación económica” na que se atopa o concello. Segundo García, o consitorio carga cunha débeda de 1,5 millóns de euros -o 75% do orzamento anual do municipio- herdada do anterior goberno, rexentado polo popular Javier Varela.
Entre as débedas acumuladas, García Porto enumerou os 300.000 euros que o concello está obrigado a pagar por sentenzas xudiciais, e 75.000 euros polo impago do subministro de electricidade nas instalacións municipais. Tamén mecionou os 60.000 euros mensuais por impagos do servizo de tratamento do lixo e da gardería que lles retén Sogama e o Consorcio Galego de Benestar, e a compra de dous inmobles -22.000 euros pola Casa da Irmandade e 79.000 euros pola Casa Cuartel.
Tamén denunciou “un feito aínda máis alarmante que a débeda”, xa que segundo a alcaldesa, o anterior alcalde desviou os 816.000 euros de fondos europeos que o concello obtivo en decembro do 2022 para a reforma da Casa da Cultura para o pago de facturas nos meses previos ás eleccións municipais. Engadiu García Porto que “a maiores dese pufo, haberá que pagar outros 277,000 euros porque, por un lado, tivemos que refacer o proxecto técnico, que non se adaptaba ás actuacións subvencionables, e, por outro, porque o concello tiña mal calculado o IVE e hai que aportalo dende o concello”.
O PP de Antas de Ulla responde
Ante este comunicado do goberno local, o PP de Antas de Ulla reapondeu con consistencia. “Desmentimos que se desviaran fondos públicos para o pago de facturas, cousa que en ningún momento se produciu, pois o importe da subvención integra correctamente o orzamento municipal de ingresos”, asegurou o voceiro do PP e ex alcalde, Javier Varela.
Nun comunicado, Varela asegura que entre que se recibiron os fondos europeos ata que entrou no goberno o PSOE, en xuño de 2023, a tesourería municipal efectuou os pagos de nóminas, facturas e cotizacións con normalidade.
Tamén afirma Varela que antes de saír do consistorio se levou a cabo unha acta de arqueo cun saldo de 436.036,44 € nas contas do Concello, cunha estimación de 420.000 euros de ingresos por cobrar.
