A Mesa de Negociación do Concello de Lugo vén de aprobar, por unanimidade da forzas presentes na mesma (CC.OO, CSIF, CIG, UXT e SPPLB, esta última sen dereito a voto), as bases xerais que rexerán as Ofertas de Emprego Público dos vindeiros anos e que goberno local prevé convocar proximamente.
Así o anunciou o responsable da área de Persoal, Pablo Permuy, quen sinalou que “a excepción do sindicato AFI -USO, que se desmarcou deste proceso dende o inicio, o resto da representación do persoal municipal avala o documento acadado no que, entre outros aspectos, se recollen os contidos mínimos que deben figurar nas diferentes probas, as súas modalidades e desenvolvemento, o sistema selectivo, os requisitos a cumprir polos/as aspirantes e mesmo as materias comúns a cada grupo, etc”.
O concelleiro sinalou que o acordo chega despois de dúas xornadas de debate nas os diferentes sindicatos achegaron as súas propostas. “Suxestións e peticións que se tiveron en conta na súa totalidade e das que máis da metade se incorporaron ao texto”, subliñou Pablo Permuy, ao tempo que agradeceu o labor levado a cabo polos sindicatos que interviron “para acadar un documento amplo, moi completo e colaborativo que será, sen dúbida, unha ferramenta de gran utilidade á hora de afrontar a cobertura das prazas recollidas nas OEP’s e de dotar de recursos humanos á Administración local”, sostivo o edil.
O concelleiro de área explicou que o obxecto destas bases é a regulación do procedemento xeral para o acceso en propiedade ás prazas vacantes de funcionarios de carreira e persoal laboral, tanto en quenda libre como de promoción interna, que están incluídas nas ofertas de emprego público do Concello de Lugo a razón de 26 prazas dentro da OEP de 2021 (18 en quenda libre e 8 por promoción interna) e 35 na de 2022 (32 de promoción libre e 3 de promoción interna), ao tempo que se está a elaborar a correspondente ao 2023.
Trala validación, mañá, do documento en Xunta de Goberno, as bases serán publicadas nos Diarios e Boletíns Oficiais.
