A Consellería de Infraestruturas e Mobilidade da Xunta, vén de autorizar a prolongación da liña de transporte público por autocar que, ata o momento, unía a localidade do Pacio, en Láncara, coa de Sarria (XG72706). Deste xeito, a Xunta autoriza a creación dunha nova parada ao inicio da ruta, na marquesiña da Pobra de San Xiao, desde onde continuará ata rematar no IES Xograr Afonso Gómez de Sarria.
O Goberno galego dá resposta deste xeito ás demandas formuladas desde a dirección do instituto de Sarria tras constatar que unha parte do alumando que finaliza os seus estudos de Secundaria no CPI Ramón Piñeiro de Láncara adoita continuar a súa formación académica de Bacharelato e Ciclos Formativos no IES Xograr Afonso Gómez de Sarria. Ata o momento non existía ningún servizo de transporte público por autocar cun horario compatible que permitira desprazarse aos devanditos centros de ensino.
A prolongación da ruta suporá un incremento de 6 minutos na duración total do desprazamento, que se completará entre 15 e 20 minutos. Son 4 quilómetros adicionais nunha expedición de ida e volta, que se se desenvolve, durante o período lectivo, de luns a venres con saída ás 8.10 horas e regreso ás 14.40 horas.
A prolongación da ruta entre A Pobra de San Xiao e Sarria tamén continuará fóra do curso escolar os venres en horario de 8.30 horas e regreso ás 13.30 horas.
As paradas previstas son a marquesiña da Pobra de San Xiao, O Pacio, Crecente, Santa María do Vilar, Betote, centro de saúde de Sarria, CEIP Frei Luís de Granada e IES Xograr Afonso Gómez de Sarria.
