Inauguración Museo Provincial de Lugo. Fonte: Deputación de Lugo.Este mércores, 4 de decembro, foi inaugurada no Museo Provincial de Lugo a exposición ‘Percorrendo Fotografía a Cegas’. A mostra é unha recompilación do traballo realizado durante os últimos 13 anos no marco do proxecto promovido pola Rede Museística Provincial. A dinámica naceu como unha proposta para a inclusión laboral de persoas con discapacidade visual dentro da institución e rematou por supoñer un método para a súa integración no proceso creativo fotográfico, ademais dun argumento para desbotar a idea da discapacidade como impedimento.
A exposición atópase na Sala de Exposicións Temporais do edificio e acolle imaxes realizadas nos distintos museos provinciais, coa participación de artistas de diferentes disciplinas como Germán Limeres, Xosé Reigosa, Iago Eireos ou Eva Díaz. Na inauguración foi proxectado un vídeo que contou coa participación de alumnado do Colexio Fingoi, que amosou especial interese pola cotidianidade das persoas con discapacidade visual partícipes nos obradoiros artísticos e parte do persoal dos museos.
