O paso alternativo de Recimil entra hoxe en funcionamento. Así o anunciou a alcaldesa Lara Méndez, que se achegou onte ao lugar para dar conta do final das obras. Este paso provisional será o operativo mentras que Adif constrúa un paso definitivo para os veciños da zona.
Este novo itinerario xorde da necesidade de aumentar a seguridade dos vehículos que teñen que cruzar a vía. O novo paso substitúe ao antigo, no que dous rapaces perderon a vida polo impacto dun tren contra o coche no que circulaban o pasado mes de xullo.
Os traballos realizados por Adif ao longo dos últimos dous meses consistiron na construción dun camiño provisional paralelo á vía que conecta o punto onde se atopaba o paso a nivel clausurado con outro inferior situado a 300 metros en dirección norte. O novo itinerario conduce ata unha infraestrutura que conta coa altura necesaria para o tránsito de vehículos de grandes dimensións.
Dende a subdelegación do Goberno, Isabel Rodríguez indicou que a intención é a de acurtar prazos para a construción do paso definitivo, perseguindo “o obxectivo de consolidar as conexións e facilitar a mobilidade dos lucenses coa máxima garantía” a través da colaboración entre o Concello e o Goberno central.
