O PP de Lugo propón trasladar o cuartel da Policía Nacional ao edificio de Obras Públicas, situado na Ronda da Muralla. Esta proposta chega despois de que a candidata dos populares por Lugo, Elena Candia, se reunira co Sindicato Unificado da Policía Nacional, que asegurou que “para garantir a seguridade e prestar un mellor
servizo á cidadanía, ademáis de ter efectivos suficientes, é fundamental contar con infraestruturas axeitadas”.
Segundo a voceira do PP, esta proposta cumpriría con varios requisitos que vén reclamando o sindicato policial e a cidadanía. O primeiro deles é a proximidade coa actual comisaría, xa que entre esta e o edificio de Obras Públicas hai 50 metros. Tamén asegura que é un proxecto “máis sostible”, posto que non habería que construír un complexo novo; e que permitiría rescatar os fondos consignados para investir en melloras da actual comisaría da Rúa Chantada. Esta dotación, ademais, quedaría na contorna do barrio da Residencia, algo que viñan reclamando os veciños.
Para levar a cabo este plan, sería necesario chegar a acordos tanto por parte da Xunta como por parte do Goberno central, posto que a Xunta é a propietaria do cuarto e do quinto piso do edificio de Obras Públicas, baleiros dende hai anos. Ademais, o Estado tería que trasladar as oficinas da Confederación Hidrográfica, Costas e Obras Públicas ao edificio onde hoxe está á Comisaría da Policía Nacional na rúa Chantada.
