O Partido Popular no Concelllo de Lugo denuncia a falta de mantemento do polígono das Gándaras. O vicevoceiro dos populares, Antonio Ameijide, manifestou que a imaxe que ofrece nestes momentos esta área industrial é “selvática, coma se se tratase dunha zona abandonada, presentando un estado máis propio dun monte sen propietario que dun polígono industrial de primeira categoría”.
Por este motivo, reclaman que o Goberno local realice un correcto mantemento das zonas verdes e doutras dotacións do polígono. O popular explicou que, neste momento, “a maleza aprópiase das zonas verdes, medianeiras e rotondas da zona industrial, os paseos peonís están prácticamente borrados e hai árbores secas”.
Ameijide tamén reclamou o arranxo do mobiliario xa que “a maleza oculta os bancos, moitos deles rotos e moi deteriorados”.
