O Grupo Popular Provincial denuncia que se están a producir retrasos nas obras de mellora do anexo ao Pazo Provinvial de Deportes, ao cargo da Deputación. Antonio Ameijide, portavoz do PP provincial, asegurou que estes retrasos producen “graves prexuízos para os seus usuarios que non poden adestrar nin disputar os seus encontros oficiais”.
Ameijide esixe á Deputación explicacións sobre a tardanza da instalación do parqué e pide aclarar os rumores sobre “se houbo ou non problemas que xustifiquen o atraso”. “Mentres fixo bo tempo, os clubes aproveitaron para adestrar no exterior, pero agora no inverno non é viable e, ademais, o resto de instalacións deportivas do municipio lucense e incluso dos municipios limítrofes están xa colapsados”, asegurou o voceiro.
Os populares tamén queren saber a previsión para a finalización das actuacións e da data na que o Anexo estará a disposición dos clubs. Ademais, lembran que “segue pendente a construción ou habilitación de vestiarios que den servizo ás pistas do Anexo ao Pazo”.
