O viceportavoz do Grupo Municipal do Partido Popular no Concello de Lugo, Enrique Rozas, solicita ao equipo de goberno “que aproveite as obras que está a realizar nas pistas de atletismo das Pedreiras para arranxar e corrixir a degradación que presenta o campo central, que se usa principalmente para as probas de lanzamento e para os adestramentos e partidos dos equipos de rugby da cidade”.
Enrique Rozas lembra que “no momento da inauguración deste campo era unha instalación punteira en Galicia, sendo a envexa do resto de equipos da comunidade que vían como Lugo contaba cunha gran instalación para os partidos de rugby”, e engadiu que “o problema é que desde entón nada se fixo por coidar este campo, a pesar dos esforzos dos integrantes dos equipos de rugby por manter no mellor estado posible o terreo de xogo xa que, en gran medida, a súa integridade física depende diso ao ser o rugby un deporte de moito contacto físico e moitas caídas ao chan”.
Rozas salientou que “este campo dá cabida a uns 90 nenos, que son os que forman parte da escola de rugby, sen contar cos integrantes dos primeiros equipos dos persoais masculina e feminina, ademais dos adestramentos que fan os atletas que practican algún tipo de disciplina de lanzamento, o que fai que o céspede necesita dun bo coidado, para albergar diferentes disciplinas deportivas”; e sinalou que
” se de verdade o Concello de Lugo quere apostar pola base hai que apostar por todas as disciplinas e aí inclúese o rugby”.
