A Sala do Civil e Penal do Tribunal Superior de Xustiza de Galicia (TSXG) absolve a un condenado pola Audiencia Provincial de Lugo a cinco anos de cárcere por cometer un delito continuado de abuso sexual sobre unha das súas netas, menor de idade e cunha discapacidade. A Sala considera invalida a proba preconstituída debido a que non se incorporou ao xuízo oral, nin mediante a súa reprodución videográfica nin mediante a súa lectura. Desta forma, o alto tribunal galego acolleu o recurso de apelación interposto pola defensa do procesado, contra o que a Fiscalía non presentou alegación.
“En efecto, a menor declara ante o IMELGA e transcríbese a súa declaración, pero tal documento non é incorporado con ningún soporte ao plenario, coa xustificación dunha deficiente audición”, explican os maxistrados na resolución, na que salientan que, ao prescindir do devandito documento, “o acervo probatorio queda reducido a unha testifical contraditoria”. Así, indican que as dúas testemuñas -o pai da menor e un amigo- que aseguran que presenciaron os presuntos tocamentos realizados polo acusado á menor presentan “problemas de adicción a substancias estupefacientes”, ao que engaden que o pai da nena “se atopa enfrontado co seu proxenitor -o acusado-”.
Por outra banda, a Sala destaca que os outros dous fillos do procesado e a súa outra neta “descartan tal posibilidade, atribuíndo a motivos espurios a acusación”. Finalmente, aseguran que a proba practicada en segunda instancia “sobre feitos de nova noticia ocorridos días antes do xuízo oral ante a Audiencia, consistentes en wasaps”, potencia “a posible manipulación da menor, que só recoñece a súa existencia tras a insistencia da nai, e que ten graves dificultades de expresión, o que desvaloriza a capacidade de convicción dos wasaps”.
“A nosa conclusión é que, se aplicamos unhas mínimas doses de racionalidade ao cadro probatorio valorable, non é factible construír o xuízo de autoría do acusado conforme a un discurso sólido e expresivo do grao de certeza esixido para fundamentar a súa condena polo imputado delito de abusos sexuais a unha menor de dezaseis anos”, sinala o TSXG na sentenza, contra a que cabe presentar recurso ante o Tribunal Supremo.
