O Voceiro do PSOE en Abadín, Pablo López denunciou que os 107 nenos e nenas de Abadín son atendidos dúas horas, unha vez á semana por un médico de familia. Díaz fíxose eco das queixas dos pais e nais da vila que reclaman unha mellor atención pediátrica no centro de saúde.
O Voceiro Socialista relata que segundo os pais e nais tiveron fai uns días unha xuntanza cos responsables do Sergas en Lugo, “na que o Alcalde non abriu a boca para defender os intereses e as reclamacións das nosas veciñas e veciños”.
“Todos os pais e nais reclamamos maior atención médica na vila, e que a consulta sexa atendida por un especialista, é dicir un pediatra. Ademais, cando está de baixa ou de vacacións todos os nenos e nenas teñen que ser atendidos no Centro de Vilalba, que non son consultados ata última hora da mañá cando remata as citas previas”, explicou.
Así as cousas, Pablo Díaz criticou “a discriminación constante dos veciños do rural e a nula sensibilidade coa atención sanitaria en Abadín”. E insistiu nas súas criticas “o Goberno de Feijoo e o Alcalde de Abadín son incapaces da dar resposta ás demandas xustas dos nosos veciños para atender aos nosos nenos e nenas da nosa vila”, resumiu.
