Carlos ArmestoO vicevoceiro do Partido Popular na Deputación Provincial censurou “que os deputados nacionalistas se permitan o luxo de asegurar que unha dedicación parcial de 25.000 euros é un soldo miserable, cando moitos veciños, alcaldes e edís da provincia non chegan a el”.
Armesto defendeu a moción que presentaron para a redución de cargos do BNG na Deputación, “xa que non tiña sentido que o os nacionalistas con só dous deputados mantiveran 9 asesores e dúas dedicacións exclusivas completas, mentres que o PP con doce deputados dispoña de tres asesores e tres dedicacións”. Ademais indicou “que coas emendas rexistradas no último pleno o custe para os lucenses redúcese en 268.700,76 euros”. Aínda así, os populares defenden que o BNG segue sobre-representado e moi beneficiado desde o punto de vista das achegas que recibe da Deputación en concepto de asignación económica aos grupos, salarios e persoal de apoio.
Sumando estes tres conceptos, segundo os populares, os datos son os seguintes: O PP con 12 deputados recibe un total anual 488.590,56 euros; mentres que o BNG con 2 deputados recibe un total anual de 206.876,46 euros.
Pola súa banda o BNG dixo por boca dos seus deputados que continuaran na Deputación,”por que non nos anulan cunha presada de cartos”. O deputado nacionalista Xose Ferreiro afirmou que “non imos permitir que nin Candia, nin Martínez nos digan cando temos que estar no goberno e cando non” e sinalou que “asumiría, sen dedicación exclusiva, as tarefas de goberno”.
