A paraxe da Carballeira de Santa Isabel en Outeiro de Rei será o escenario perfecto no cal facer sonar a música de Milesios, Reviravolta, Maraxe ou Parabéns, na foliada que animará Xurxo Souto a partir das 17 horas para conmemorar a cuarta edición do Convivio da Cultura Galega que se levará a cabo este sábado, 8 de xullo.
O encontro, aberto a todas as persoas e a todo o asociacionismo cultural, desenvolverase entre a Casa-Museo Manuel María, no centro da vila de Outeiro, onde se recibirá os participantes a partir das 11 da mañá, e a Carballeira de Santa Isabel, unha paraxe natural situada a menos de 1 quilómetro da casa natal do escritor.
O Convivio organizado pola Casa-Museo Manuel María, xunto á federación Galiza Cultura de asociacións culturais galegas e a Asociación Cultural e Musical Solfa de Compostela, quere ser, sobre todo, unha xornada lúdica e festiva, de convivencia, e recuperación do espírito da tradicional romaría da Santa Isabel de Outeiro de Rei, de foliadas e xantar. Todo isto arredor da figura de Manuel María, que dedicou por enteiro a súa vida á construción dunha cultura propiamente galega, dun país normal e normalizado, e que tanto colaborou co nacemento de asociacións e proxectos culturais.
