O delegado do Goberno en Galicia, Pedro Blanco, declarou hoxe en Lugo que as obras da estación intermodal que se están a celebrar na contorna da estación do ferrocarril estarán rematadas a finais deste ano”.
Segundo Blanco,”a nova estación de Lugo transformará a mobilidade da cidade e dará resposta ao incremento de viaxeiros pola renovación da liña Lugo-Ourense, que conecta a capital lucense coa alta velocidade”. As obras inclúen un novo edificio de viaxeiros, a adecuación da zona de plataformas, un paso inferior mixto para uso de viaxeiros e para uso público, unha pasarela peonil e a urbanización da contorna, quedando integrada nunha praza intermodal que conectará as terminais de ferrocarril e autobús.
Na actualidade está a executarse o empurre baixo vías do paso inferior de dobre funcionalidade: acceso á plataforma central e uso como paso peonil de cidade. Esta actuación inclúe os traballos, xa realizados, do apeo das 4 vías da estación, necesarios para levar a cabo o empurre do paso inferior, construído en formigón de forma previa na zona anexa. Mediante este proceso construtivo de apeo e empurre pódense compatibilizar as obras sen interromper o tráfico ferroviario.
O delegado do Goberno subliñou que, “unha vez demolido o antigo edificio de Correos, avanzan a bo ritmo os traballos de construción do novo edificio da Estación, coa execución da estrutura en planta baixa e planta alta”.
