A Alcaldesa de Lugo, Lara Méndez, a concelleira de Cultura, Turismo, Xuventude e Promoción da Lingua, Carmen Basadre, e o presidente da Asociación Provincial de Empresarios de Hostelería e Turismo de Lugo (APEHL), Cheché Real, presentaron este xoves no Salón de Plenos do Concello o XI Concurso de Tapas de Lugo, que acollerán os locais hostaleiros da cidade do 11 ao 27 de setembro.
O Concello colabora con esta cita gastronómica cunha achega económica de 15.000 euros. “Enmárcase na nosa aposta por promover un turismo do século XXI: cultural, gastronómico, accesible, interactivo e ben colocado”, asegurou Méndez.
A rexedora subliñou a “estreita” colaboración que se estableceu ente Concello e APEHL para potenciar a Lugo como destino gastronómico. “Apoiar este certame significa reivindicar o noso: o noso patrimonio, a nosa gastronomía, a nosa arqueoloxía e o noso pasado romano”.
“Esta cita gastronómica reúne en Lugo a centos de visitantes para saborear as creativas propostas gastronómicas concursantes, oportunidade que non podemos deixar escapar para dinamizar o sector turístico”, afirmou a Alcaldesa.
Pola súa banda, Cheché Real agradeceu a colaboración do Concello, ao tempo que destacou que “a gastronomía é un dos atractivos máis interesantes da nosa cidade”. Neste senso, tamén incidiu Basadre, quen aproveitou para animar aos hostaleiros a sumarse a esta iniciativa, que cada ano renova o atractivo gastronómico da cidade ao tempo que impulsa a marca … E para comer Lugo.
No acto, o presidente da Asociación Provincial de Empresarios de Hostelería e Turismo de Lugo adiantou novidades con respecto ás anteriores edicións, froito das suxerencias dos establecementos participantes. Nesta undécima edición do Concurso de Tapas, o público terá dereito a votar sen ter que visitar 3 establecementos. Ademais, serán os participantes os que decidirán cos seus votos os 12 locais máis votados, 2 máis que a pasada edición.
O público elixirá a mellor tapa popular, con maior aceptación. Anteriormente, determinaba coa súa votación o establecemento gañador. Nesta ocasión será o xurado técnico o que xulgue estes 12 locais, de onde sairá a tapa gañadora do concurso. Este xurado outorgará ademais os premios á mellor tapa tradicional e á mellor tapa creativa, ademais das maridaxes con viño da Denominación de Orixe Ribeira Sacra ou a que mellor use a cervexa Estrella Galicia como ingrediente.
O público poderá degustar as tapas en horario de 13:00 a 15:30 horas e de 20:30 a 22:00 horas, durante os 17 días que durará o concurso. O prezo da tapa estará comprendido entre 1 e 3 euros. Todos os locais hostaleiros interesados en participar poden inscribirse ata o vindeiro venres, 7 de agosto.
