Retirados os orzamentos da Deputación de Lugo para o 2016. Foi no trascurso do pleno extraordinario celebrado esta mañá no ente provincial para debater as alegacións presentadas ás contas públicas.
O Partido Popular e o deputado non adscrito Manuel Martínez sacaron adiante cos seus 13 votos fronte os 12 de socialistas e nacionalistas as alegacións presentadas polo PP. Con todo, a polémica xurdiu trala aprobación dunha alegación presentada por Martínez acerca da creación dunha residencia no concello de Becerreá, que tamén foi aprobada cos votos del mesmo e polos populares.
Na redacción desa proposta apelábase á “inmediata retirada dos orzamentos” para incorporar o texto da alegación. Membros do Goberno e a oposición iniciaron nese intre un cruzamento de acusacións. Dunha banda, o presidente da Deputación, Darío Campos, entendeu que a aprobación desa proposta implicaba a inmediata retirada das contas públicas, mentres que a oposición sostiña que esa frase só instaba ao Goberno a correxir a anterior redacción e incorporar a alegación de Martínez.
Os orzamentos foron retirados. A voceira dos populares, Elena Candia presentou xa no rexistro da Deputación un documento no que se incorpora á redacción orixinal dos orzamentos as alegacións dos populares e do deputado non adscrito e anuncia que pedirá a convocatoria dun pleno extraordinario para se aprobe dito documento e a provincia poida ter aprobadas as súas contas públicas. O presidente ten 15 días de prazo para convocar ese pleno extraordinario.
