Desde a Federación provincial de Asociacións Veciñais “Lucus Augusti” de Lugo, defendemos, unha vez máis, tras máis de 10 anos facéndoo, a implementación e posta en funcionamento da Rolda Este, por constituír unha infraestrutura fundamental, necesaria e dunha utilidade incuestionable para a cidade de Lugo, xa que permitiría o desconxestionamento de tráfico da estrada perimetral do río Rato, ademais da Ronda das Fontiñas, e dos barrios da zona sur da cidade de Lugo; así como tamén para quen acode ao Hospital Universitario “Lucus Augusti” desde o sur da provincia lucense.
Desde a nosa entidade, solicitamos tamén, que o impacto ambiental que se derive da posta en funcionamento da tan necesaria Rolda Este, sexa, por suposto, o mínimo posible, e é ese un labor que corresponde aos técnicos e que é, en todo caso, factible. Con todo, non entendemos que, en pleno ano 2023, a aparición ou existencia de especies “únicas” -vexetais ou animais- supoñan unha razón consistente e realista que impida a execución desta infraestrutura que, reiteramos, é fundamental para o desconxestionamento do tráfico na capital lucense, así como para lograr unha circulación de trafico fluída e adaptada aos tempos en que vivimos.
Non pretendemos, desde a nosa entidade, en ningún caso, danar a contorna natural do río Rato, e estudaremos o proxecto, a fin de facer alegacións que o poidan mellorar a este respecto. Somos, sen ningún tipo de dúbida, grandes defensores desta contorna natural privilexiada, e trataremos, por tanto, de atopar o equilibrio entre unha infraestrutura necesaria, como é a Rolda Este, e unha área verde que debemos preservar e coidar. Non nos parece serio, así mesmo, a formulación de certas alternativas para dedicar a outros fins dita partida orzamentaria plurianual. Debemos, entre todos, buscar o consenso e o equilibrio entre preservar un espazo natural único e pechar o anel perimetral de Lugo cunha infraestrutura imprescindible, en especial, para os veciños da zona sur da provincia lucense. Espazo natural do que, desde a Federación provincial de Asociacións Veciñais “Lucus Augusti” de Lugo, sentímonos moi orgullosos, e así o demostramos coa organización de actividades destinadas a promocionar o mesmo, como a camiñada anual pola devandita contorna ata o Ponte da Chanca, entre outras.
Lugo, mércores 8 de marzo de 2023
