O ritmo de contaxio da Covid19 na provincia volve a aumentar tras dúas xornadas en descenso durante a fin de semana. Mentres o domingo Sanidade cifraba en 78 os positivos detectados, na xornada de onte esta cifra elevábase ata os 110 casos novos.
Unha suba que se traduciu, ademáis no aumento dos casos activos, malia ao importante número de altas recibidas por enfermos covid. Así, en cifras, e segundo os datos recabados polo SERGAS ata as 18 horas de onte, os casos activos cífranse en 1292, 61 máis que na xornada anterior. Doutra banda, as altas recibidas elévanse ata as 16.944 dende o inicio da pandemia, 50 máis que na xornada anterior.
Asemade, o SERGAS informou na tarde de onte dun novo falecemento, o número 232 na provincia dende que o virus chegou. A última vítima da pandemia é unha muller de 89 anos que finaba no HULA o pasado sábado.
Pero non todo son malas novas. E é que a presión asistencial experimentou unha importante melloría na última xornada. En unidades convencionais, un total de 26 infectados por covid permanecen ingresados – 19 no HULA, 3 no Hospital da Costa e 4 no de Monforte, liberándose a cama que ata hoxe ocupaba un paciente covid no Polusa-. Doutra banda, a UCI do Hula libera dúas camas e quedan 3 pacientes covid en recuperación.
